Maigra Isabel Guevara Cruz

“As ameazas de morte por parte dos gandeiros non me dan ningún temor. Ao touro polos cornos, non me amedrentan.”

Maigra é defensora dos bens comúns e do territorio, especialmente da área protexida de El Jicarito, un espazo de lagoas e canles que fornece peixes e camaróns silvestres a numerosas familias da súa comunidade. Un lugar que ela describe así: “A nosa paisaxe é fermosa e síntome ditosa, orgullosa de camiñar entre tantas aves de diferentes cores. Aquí o reflexo do ceo está plasmado no mar.”

A súa loita comezou en 1985, cando sendo moi nova participou xunto á súa familia e outras comunidades na defensa das zonas de pesca fronte a empresarios que querían apoderarse dos canles e lagoas. Desde entón, o seu compromiso coa defensa do territorio non cesou:

• É líder da Asociación de Pescadores de Namasigüe, desde onde impulsa accións de conservación da área protexida.
• Liderou a construción de canles para restaurar o fluxo da auga e recuperar os manglares, devolvendo a vida a espazos degradados.
• Para defender este proxecto enfrontouse ás autoridades, organizou cortes de estradas e falou ante o Congreso Nacional sen medo.
• Denunciou ante o ICF e a Procuradoria Xeral a introdución ilegal de gando nas lagoas, logrando resolucións xudiciais favorables.
• Pertence á Rede de Mulleres de Namasigüe e é defensora activa dos bens comúns.

A pesar de ter recibido ameazas de morte, Maigra non se amedrenta. Como ela mesma di: “Ao touro polos cornos.”